Церковный календарь

Сщмч. Дионисия Ареопагита. Тропарь, глас 4.
Бла́гости научи́вся и трезвя́ся во всех,/ благо́ю со́вестию священноле́пно обо́лкся,/ поче́рпл еси́ от сосу́да избра́ннаго неизрече́нная/ и, ве́ру соблю́д, ра́вное тече́ние соверши́л еси́,/ священному́чениче Диони́сие,/ моли́ Христа́ Бо́га спасти́ся душа́м на́шим.

Кондак, глас 8.
Небе́сная врата́ проше́д ду́хом я́ко учени́к/ до тре́тияго Небесе́ дости́гшего апо́стола, Диони́сие,/ неизрече́нных обогати́лся еси́ вся́ким ра́зумом/ и озари́л еси́ во тьме неве́дения седя́щия./ Те́мже зове́м:/ ра́дуйся, о́тче всеми́рный.

Прп. Амвросия, старца Оптинского и всея России чудотворца (обретение мощей). Тропарь, глас 5.
Я́ко к целе́бному исто́чнику/ притека́ем к тебе́, Амвро́сие, о́тче наш./ Ты бо на путь спасе́ния нас ве́рно наставля́еши,/ моли́твами от бед и напа́стей охраня́еши,/ в теле́сных и душе́вных ско́рбех утеша́еши,/ па́че же смире́нию, терпе́нию и любве́ науча́еши./ Моли́ Человеколю́бца Христа́/ и Засту́пницу усе́рдную/ спасти́ся душа́м на́шим.

Прп. Дионисия, затворника Печерского, в Дальних пещерах. Тропарь, глас 4.
Же́ртву Безкро́вную приноси́вый Го́сподеви непоро́чне/ и служи́вый Ему́ по зва́нию своему́ мно́гое вре́мя неле́ностне,/ свяще́нне Диони́сие,/ моли́ся о нас,/ любо́вию чту́щих тя.

Кондаке, глас 2.
Священноде́йствовавшаго на земли́ священноле́пно/ и потруди́вшагося в чину́ свое́м до́бре,/ ны́не же на Небесе́х лику́еши све́тло,/ свяще́нными похваля́ем тя пе́сньми, Диони́сие, и мо́лим:/ моли́ Христа́ Бо́га непреста́нно о всех нас.